បច្ចេកវិទ្យា RAID 10 រួមផ្សំគ្នារវាង RAID 0 និង 1

RAID គឺជាបច្ចេកវិទ្យាដែលត្រូវបានគេប្រើដើម្បីបង្កើនកម្រិតដំណើរការ និង ភាពទុកចិត្តចំពោះកន្លែងរក្សាទុកទិន្នន័យ ។ RAID ខ្លាយមកពីពាក្យពេញ Redundant Array of Inexpensive Disks ។ នៅក្នុងប្រព័ន្ធ RAID មួយផ្ទុកទៅដោយថាសរឹងពីរ ឬ ច្រើនដំណើរការស្របគ្នា ។ ថាសរឹងទាំងនោះអាចជាថាសរឹង Hard Disk ប៉ុន្តែក៏មានការនិយមប្រើប្រាស់បច្ចេកវិទ្យានេះជាមួយឌីស Solid state Drive ផងដែរ ។ ប្រព័ន្ធ RAID មាន ច្រើនលំដាប់ថ្នាក់ហើយត្រូវបានគេប្រើទៅតាមស្ថានភាពខុសៗ គ្នា ដោយមិនបានរៀបចំបទដ្ឋានដោយស្ថាប័ន ឬ សហគមបទដ្ឋានណាមួយឡើយ ។ បច្ចេកវិទ្យា RAID ត្រូវបានគេបង្កើតឡើងទៅតាមលំដាប់ផ្សេងៗគ្នា ដើម្បីផ្ដល់មុខងារប្រើប្រាស់សម្រាប់គ្រប់គ្រងទៅលើ Disk storage ។ បច្ចេកវិទ្យា RAID ថ្មីគឺ RAID 10 ដែលត្រូវបានគេបង្កើតឡើងពីការបញ្ចូលរវាង RAID 1 និង RAID 0ដើម្បីទាញយកអត្ថប្រយោជន៍ពី RIAD ទាំងពីរនេះទៅជាបច្ចេកវិទ្យាតែមួយ ។ ដូច្នេះតើ RAID 0 និង RAID 1 មានលក្ខណពិសេសយ៉ាងណា ហើយនៅពេលបញ្ចូលគ្នាទៅជា RAID 10 តើនឹងផ្ដល់គុណសម្បត្តិយ៉ាងណាទៀត ។

RAID level 0 (stripping)

នៅក្នុងប្រព័ន្ធ RAID 0 ត្រូវ បានគេបែងចែកទៅជាផ្នែកៗ ដែលត្រូវបញ្ចូលទិន្នន័យទៅក្នុងផ្នែកទាំងអស់នៃសំណុំឌិសទាំងមូល ។ ដោយប្រើប្រាស់ថាសច្រើន យ៉ាងហោចណាស់ចំនួនពីរក្នុងពេលតែមួយ ដែលផ្ដល់នូវការប្រតិបត្តិការចេញនិងចូលបានលឿន ។ ការប្រតិបត្តិការនេះអាចដំណើរការកាន់តែបានលឿនដោយប្រើម៉ាស៊ីន គ្រប់គ្រងផ្សេងគ្នា ជាពិសេសត្រូវការម៉ាស៊ីនគ្រប់គ្រងមួយសម្រាប់ Disk មួយ ។ RAID 0 គឺ ជាប្រព័ន្ធសមស្របសម្រាប់កន្លែងផ្ទុកទិន្នន័យដែលមិនសំខាន់ដែល ត្រូវការល្បឿនចេញ និង ចូលក្នុងកម្រិតខ្ពស់ ដូចជាកន្លែងប្រើប្រាស់ឯកសារមេឌៀរួមគ្នាជាដើម ។

គុណសម្បត្តិ

RAID 0 ផ្ដល់ប្រតិបត្តិការល្អ ទាំងប្រតិបត្តិការចេញនិងចូល និងមិនមាន Overhead ដែលបណ្ដាលមកពី parity control ឡើយ ។

រាល់ចំណុះផ្ទុកទិន្នន័យទាំងអស់ត្រូវបានប្រើប្រាស់ដូច្នេះមិនមាន Disk Overhead ឡើយ

បច្ចេកវិទ្យានេះងាយស្រួលក្នុងការប្រតិបត្តិ

គុណវិបត្តិ

RAID 0 មានវិបត្តិខ្ពស់( គ្មាន Fault-tolerant) ប្រសិនបើ ឌីសមួយខូច នោះរាល់ទិន្នន័យដែលមាននៅក្នុងសំណុំ RAID 0 ទាំងអស់នឹងត្រូវបាត់បង់ ដែលជាហេតុធ្វើអោយវាមិនគួរប្រើសម្រាប់ឌីសផ្ទុកទិន្នន័យសំខាន់ៗ ។

RAID level 1 ( Mirror )

សម្រាប់ប្រព័ន្ធ RAID 1 រាល់ ទិន្នន័យទាំងអស់ត្រូវបានរក្សាទុកផ្ទួនដងដោយបញ្ចូលវាទៅក្នុង ឌីសទាំងពីរ ។ ប្រសិនបើ ឌីសមានបញ្ហា ម៉ាស៊ីនគ្រប់គ្រងនិងប្រើឌីសមួយសម្រាប់ទាញយកទិន្នន័យមកវិញហើយ បន្តប្រតិបត្តិការទៅមុខទៀត ដូច្នេះគេត្រូវការឌីសចំនួនពីរសម្រាប់ សំណុំប្រព័ន្ធ RAID 1 ។ បច្ចេកវិទ្យា RAID 1 សមស្របសម្រាប់ប្រើនៅក្នុងការរក្សាទុកទិន្នន័យសំខាន់ៗ ជាពិសេសសម្រាប់ប្រព័ន្ធគណនី ហើយក៏សមស្របសម្រាប់ម៉ាស៊ីន Server តូចៗដែលត្រូវការតែឌីសចំនួនពីរប៉ុណ្ណោះ ។

គុណសម្បត្តិ

RAID 1 ផ្ដល់នូវល្បឿន ចេញ និង ចូលបានលឿនស្មើរទៅនឹងឌីសតែមួយ

នៅក្នុងករណីមានឌីសមួយខូច គេមិនចាំបាច់រៀបចំទិន្នន័យសារឡើងវិញឡើយ គឺគ្រាន់តែចម្លងមកផ្លាស់ប្ដូរប៉ុណ្ណោះ

គុណវិបត្តិ

គុណវិបត្តិ ជាចម្បងគឺចំណុះផ្ទុកទិន្នន័យដែលប្រើបានមានចំណុះត្រឹមតែពាក់ កណ្ដាលនៃចំណុះឌីសសរុបប៉ុណ្ណោះ ព្រោះតែទិន្នន័យត្រូវបានគេបញ្ចូលផ្ទួនដងទៅលើឌីសទាំងពីរ។ ហើយការប្រើប្រាស់ RAID 1 មិន អនុញ្ញាតិអោយធ្វើការប្ដូរឌីសដែលខូចចេញបានភ្លាមឡើយ មានន័យថាវាមិនអាចផ្លាស់ប្ដូរនៅពេលដែលម៉ាស៊ីនកំពុងតែដំណើរការ ។

RAID level 10

ប្រព័ន្ធ RAID 10 បានបញ្ចូលទាំងគុណសម្បត្តិ និង គុណវិបត្តិនៃ RAID 1 និង RAID 0 ទៅក្នុងធ្វើជាប្រព័ន្ធតែមួយ ។ វាផ្ដល់នូវសុវត្ថិភាពខ្ពស់ដោយចម្លងទិន្នន័យទាំងអស់ទៅលើឌីសផ្នែកទីពីរ (ឌីស 1 និង ឌិស 2 ហើយ ឌិស ៣ និង ៤ ដូចរូប ) ហើយក្នុងពេលនោះប្រើប្រាស់RIAD 0 ទៅលើសំណុំឌិសទាំងពីរ ដើម្បីបង្កើនល្បឿនបញ្ជូនទិន្នន័យ ។ ដូច្នេះយើងត្រូវការឌីសតិចបំផុតចំនួន 4 ដោយរៀបចំឌីសពីរធ្វើជា RAID 1 ហើយគេធ្វើ RAID 0 ទៅលើឌីស RAID 1 ទាំងពីរ ។ RAID 10 សមស្របសម្រាប់ស្ថាប័នដែលដំណើរការ Database និង កម្មវិធីក្នុងកិច្ចការជំនួញដែលត្រូវការប្រសិទ្ធភាពក្នុងការរក្សា ទុកទិន្នន័យ និង ការធានាសុវត្ថិភាពទិន្នន័យជាចាំបាច់ ។

លក្ខណពិសេសរបស់ RAID 10 ៖

កម្រិតប្រតិបត្តិការខ្ពស់ជាង RAID 1 និង RAID 6

សុវត្ថិភាពការពារទិន្នន័យខ្ពស់ ជាង RAID 0 , 1 ,5

គេអាចផ្លាស់ប្ដូរចំណុះឌីសតែមួយ ឬ RAID 1 ទៅជា RAID 10

គេអាចផ្លាស់ប្ដូរចំណុះផ្ទុកទិន្នន័យរបស់ RAID ដោយគ្រាន់តែប្ដូរ Hard Disk ដែលមានទំហំធំជាង ឬបន្ថែមចំនួន Hard Disk

អាយធីខ្មែរស៊ែរ